ចៅសង្កាត់ប៉ោយប៉ែតទើបឡើងកាន់តំណែងថ្មី រងការចោទប្រកាន់ប្រព្រឹត្តអំពើពុករលួយ
11-December-2015 | ដោយ មួយឡា
បន្ទាយមានជ័យ៖ ចៅសង្កាត់ប៉ោយប៉ែត លោក អាំង គីហេង ទទួលរងការចោទពីប្រជាពលរដ្ឋថាប្រព្រឹត្តអំពើពុករលួយ យកថ្លៃសេវាធ្វើលិខិតបញ្ជាក់ប័ណ្ណកម្មសិទ្ធិដីធ្លីពីប្រជាពលរដ្ឋច្រើន ខុសពីច្បាប់កំណត់និងពុំមានវិក័យប័ត្រនោះទេ តែ លោកចៅសង្កាត់ បានបដិសេធចំពោះការចោទប្រកាន់នេះថាជារឿងមិនពិត ។
ពលរដ្ឋមួយគ្រួសារនៅភូមិសាមគ្គីមានជ័យ ស្ថិតក្នុងសង្កាត់ប៉ោយប៉ែត ក្រុងប៉ោយប៉ែតគឺលោកស្រី មឿន គន្ធា បានឲ្យដឹងកាលពីថ្ងៃទី១ ខែធ្នូ ឆ្នាំ២០១៥ ថា កាលពីចុងខែវិច្ឆិកា កន្លងទៅ លោកស្រីធ្វើលិខិតបញ្ជាក់ប័ណ្ណកម្មសិទ្ធិដីធ្លីចំនួន៣ច្បាប់ហើយ ត្រូវបានចៅសង្កាត់ប៉ោយប៉ែតតម្រូវឲ្យលោកស្រីបង់ប្រាក់ចំនួន ដប់ប្រាំម៉ឺនរៀលដោយពុំបានចេញវិក័យប័ត្រឲ្យនោះទេ។
លោកស្រីបញ្ជាក់ថាលោក អាំង គីហេង ចៅសង្កាត់ទើបឡើងកាន់តំណែងថ្មីប្រមាណពីរខែរូបនេះ តែងយកប្រាក់ពីប្រជាពលរដ្ឋដែលធ្វើលិខិតបញ្ជាក់ប្លង់ដីក្នុងមួយច្បាប់ប្រាំម៉ឺនរៀលហើយ ប្រសិនបើប្រជាពលរដ្ឋណាបង់ប្រាក់មិនគ្រប់ចំនួនទេ គឺចៅសង្កាត់មិនធ្វើលិខិតឲ្យនោះទេ ។
ឆ្លើយតបនឹងការចោទប្រកាន់ខាងលើនេះ ចៅសង្កាត់ប៉ោយប៉ែតលោក អាំង គីហេង មានប្រសាសន៍ថាលោកពុំបានបង្ខំឲ្យប្រជាពលរដ្ឋបង់ប្រាក់ធ្វើលិខិត បញ្ជាក់ប័ណ្ណកម្មសិទ្ធិដីធ្លីលើសពីច្បាប់កំណត់ ដូចការចោទប្រកាន់នោះទេ។ កន្លងទៅលោកតែងបំពេញការងារដើម្បីបម្រើសេចក្ដីសុខជូនប្រជាពលរដ្ឋ ដោយមិនគិតពីការនឿយហត់នោះឡើយ។
លោក អាំង គីហេង មានប្រសាសន៍ថា៖ ចំពោះប្រាក់វិភាគទានរបស់ប្រជាពលរដ្ឋទាំងអស់ ខ្ញុំមិនប៉ះពាល់ឡើយគឺខ្ញុំយកប្រាក់នោះទៅធ្វើការអភិវឌ្ឍក្នុងសង្កាត់ប៉ោយប៉ែតតែប៉ុណ្ណោះ ។ ប្រជាពលរដ្ឋនៅសង្កាត់ប៉ោយប៉ែតសុំមិនឲ្យបញ្ចេញឈ្មោះម្នាក់ទៀត បានឲ្យដឹងថាកន្លងទៅចៅសង្កាត់ប៉ោយប៉ែតបានតម្រូវឲ្យរូបគាត់បង់ប្រាក់ចំនួន ប្រាំម៉ឺនរៀលដែរ ក្នុងការធ្វើលិខិតបញ្ជាក់ប្លង់ដីមួយច្បាប់ ដោយពុំមានវិក័យប័ត្រនោះទេ។
ចំណែកលោក ស៊ុំ ច័ន្ទគា មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ មានប្រសាសន៍ថា បើទោះជាចៅសង្កាត់ប៉ោយប៉ែតចេញវិក័យប័ត្រឲ្យប្រជាពលរដ្ឋ យ៉ាងណាក៏ដោយ ក៏ចៅសង្កាត់មិនត្រូវយកប្រាក់ពីប្រជាពលរដ្ឋខុសពីច្បាប់កំណត់នោះទេ។ លោកបញ្ជាក់ថា ចៅសង្កាត់យកប្រាក់ពីអ្នកភូមិខុសពីច្បាប់កំណត់ គឺជាការប្រព្រឹត្តអំពើពុករលួយ ហើយសមត្ថកិច្ចពាក់ព័ន្ធត្រូវតែចាត់វិធានការលើបញ្ហានេះ ។
លោក អាំង គីហេង មន្ត្រីគណបក្សប្រជាជនកម្ពុជា បានឡើងកាន់តំណែងចៅសង្កាត់ប៉ោយប៉ែតជំនួស លោក នុត លី ដែលត្រូវបានបង្ខំឲ្យលាលែងចេញពីតំណែងកាលពីថ្ងៃទី១៨ ខែកញ្ញា ឆ្នាំ២០១៥កន្លងទៅ ។ ឡើងកាន់តំណែងចៅសង្កាត់ថ្មីនេះ ត្រូវបានប្រជាពលរដ្ឋនៅក្រុងប៉ោយប៉ែតរិះគន់យ៉ាងចាស់ដៃថា ជាការឡើងកាន់តំណែងបែបបក្ខពួកនិយមតាមរយៈ លោក ង៉ោ ម៉េងជ្រួន អភិបាលក្រុងប៉ោយប៉ែតបច្ចុប្បន្ន។ យោងតាមរបាយការណ៍សង្កាត់ ប៉ោយប៉ែតបង្ហាញថា នៅក្នុងសង្កាត់នេះមានភូមិចំនួន១៣ ហើយប្រជាពលរដ្ឋដែលមានប័ណ្ណគ្រួសាររស់នៅប្រមាណបួនម៉ឺននាក់ ៕
ប្រភព៖ meatophoum
ចំនួនអ្នកទស្សនា
- ថ្ងៃនេះ5561
- ម្សិលមិញ20231
- សប្តាហ៍នេះ84641
- ខែនេះ106521
- ឆ្នាំនេះ106521
- សរុប20548977